Profæssur ja prosjæktajådediddje journalistihka vuodoåhpadusán Birgit Røe Mathisen. Govva: Lise Fagerbakk
Sihke julev- ja oarjjelsámegiela li UNESCOa listan duodaj ájteduvvam gielaj hárráj. Sæmmi båttå l stuorra dárbbo journalistajs gudi máhtti ådåsijt gaskostit ja almulasj ságastallamav dajda gielajda buktet.
Dálla ådå åhpadusfálaldahka almoduvvá dárbov duostotjit, doajmme bielleájggeåhpadusá journalistihka vuodoåhpadusá aktijvuodan.
– Histåvrålasj ja ájnas lávkev dal válldep bisodittjat boahtteájge julev- ja oarjjelsáme journalistajt. Dát ij la ålles sáme journalisstaåhpadus, valla l ájnas lávkke. Åhpadus la dárruj, valla dat mij la sierra la juhte studenta bessi bagádusájt julev- ja oarjjelsámegiellaj oadtjot, ja aj dahkamusájt ja eksámav tjállet ietjasa giellaj, subtsas profæssur ja prosjæktajådediddje journalistihka vuodoåhpadusán Birgit Røe Mathisen.
– Nuortta universitiehtan la sierra åvdåsvásstádus julev- ja oarjjelsámegielas. Dáv åvdåsvásstádusáv mij duodaj válldep, ja åvddånahttembarggo journalistihkkabirrasij la buorre buojkulvis dasi, subtsas Sebrudakdieda fakultehta åhpadusá prodekádna Guro Øydgard.
Nuortta universitiehtta lahka aktan barggá NRK Sámijn dáv jåhtuj biejatjit. Duola dagu lájggiduvvá dievnastusá sierra sáme giellarádevaddijs NRK:as sihkarastátjit buorre gielalasj oatsodimev.
– Mij NRK Sámen galggap subttsasijt ålles Sámes gárggalit, aj julev- ja oarjjelsámegiellaj. Valla rahtjap sámegielagijt journalista gávnnat. Dan diehti l dát aktisasjbarggo Nuortta universitiehtajn viehka ájnas, javllá NRK Sáme direkterra Johan Ailo Kalstad.
– Lep harmmat mihá gå viehkken bessap oahppat dajt ådå jienajt ma galggi julev- ja oarjjelsáme almulasjvuodav hábbmit.
Hiebadahkes ja bielleájgálattjat
Journalistihka vuodoåhpadus la hiebadahkes, tjoahkkáj biejadum journalistihka bielleájggeåhpadus 30 oahppotjuokkaj. Fálaldahka l ruhtaduvvam Alep åhpadusá direktoráhtta, hiebadahkes ja sirdedum åhpadusá prográmma baktu, ja vuostasj oahppojuogos álggin gidán 2024:n.
Goappátjagá Nordnorsk Redaktørforening (Nuorttavuona Dåjmadiddjelihtte) ja Landslaget for lokalaviser (Bájkkeavijsaj rijkkasiebrre) li guojme prosjevtan ja åhpadus la lahka aktisasjbargo tjadá sijájn åvddånahteduvvam.
Journalisstaåhpadusá la buorre láhkáj guládallam NRK Sámijn ja ietjá sáme medijájn rekruttierima birra.
– Sisanov gaskostit ådåsmediajn la åbbå guovdátjin sihke ælládahtátjit gielajt, ja sáme almulasjvuodav háldadittjat. Nuortta universitiehtan la nasjonalalásj åvdåsvásstádus julev- ja oarjjelsáme gielaj ja kultuvraj dutkamis ja åhpadusás. Dan láhkáj la luondulasj ja ájnas barggo midjij dáv fálaldagáv vaddet. Ja lip riek ávon gå aktisasjbarggo NRK Sámijn la dav máhttelissan dahkam, javllá Mathisen.
Vuodooahppo l åvdemusát ulmutjijda gudi juo li barggamin, ja vihpá badjel 1,5 jage, vahkkusasj tjåhkanimijn juohkka semæsstarin. Dat vaddá hárjjidallamav guovdásj journalistihkalasj tjehpudagájda dagu gálldokritihkka, åtsådallam ja ságájdahttem, oahpásmuvvam ja almulasjvuohta, ja tevstaj, jienaj ja gåvåj hábbmim. Åhpadus vaddá biellejahkásasj bacheloråhpadusáv.
Åhtsåmájggemierre l basádismáno 15. biejve.
