Birgit Røe Mathisen, professovre jïh prosjekteåvtehke maadthlohkemasse journalistihkesne. Govle: Lise Fagerbakk
Dovne julevsaemien jïh åarjelsaemien gïelh leah UNESCO:n læstosne itjmies håvhtadihks gïeli bijjeli. Seamma tïjjen joekoen daerpies journalistigujmie mah maehtieh saerniej bïjre bievnedh jïh byögkeles digkiedimmiem daejnie gïeline sjugniedidh. Daelie orre ööhpehtimmiefaalenassem bæjhkohte mij vïedteldihkie don bielietïjjen maadthlohkemasse journalistihkesne mij joe gååvnese, juktie daam daerpiesvoetem dåastodh.
– Daelie histovrijes jïh vihkeles sïllem vaeltebe båetijen aejkien julev- jïh åarjelsaemien journalisth tjirkedh. Ij leah daate ellies saemien journalisteööhpehtimmie, men vihkeles sïlle. Ööhpehtimmie daaroengïelesne, men dïhte mij lea sjïere lea studenth maehtieh bïhkedimmiem julev- jïh åarjelsaemien gïelesne åadtjodh, jïh laavenjassh jïh eksamenem jïjtse gïelesne deelledh, Birgit Røe Mathisen soptseste, professovre jïh prosjekteåvtehke maadthlohkemasse journalistihkesne.
– Noerhte universiteeten lea sjïere dïedte julev- jïh åarjelsaemien gïeli åvteste. Daate dïedte maam itjmieslaakan vaeltebe, jïh evtiedimmiebarkoe journalistihkebyjresisnie lea hijven vuesiehtimmie daase, ööhpehtimmien prodekane Seabradahkevitenskapen fakulteetesne, Guro Øydgard jeahta.
Noerhte universiteete lïhke NRK Saepmine laavenjostoe juktie dam buektiehtidh. Gaskem jeatjah dïenesjh NRK:n jïjtse saemien gïeleraeriestæjjijste leejjie juktie hijven gïeleviehkiem tjirkedh.
– Mijjieh NRK Saepmesne edtjebe soptsesh abpe Saepmeste soptsestidh, aaj julev- jïh åarjelsaemien gïelesne. Men mijjieh tjabreminie saemiengïeleldh journalisth gaavnedh. Dan åvteste daate laavenjostoe Noerhte universiteetine joekoen vihkele, Johan Ailo Kalstad jeahta, NRK Saepmien direktööre.
– Mijjieh joekoen garmere ihke maehtebe viehkine årrodh doh orre gïelh ööhpehtidh mah edtjieh julev- jïh åarjelsaemien byögkelesvoetem hammoedidh.
Fleksijbele jïh bielietïjjen
Maadthlohkeme journalistihkesne lea fleksijbele, bielietïjjen lohkeme journalistihkesne 30 lohkemepoengigujmie, gaavnedimmiejgujmie. Direktoraate jollebe ööhpehtæmman lea beetnehvierhtieh faalenassese dåårjeme, programmen tjïrrh fleksijbele jïh desentraliseereme ööhpehtæmman, jïh voestes studentedåehkie eelki gïjren -24.
Dovne Noerhtenöörjen Redaktööresiebrie jïh Voenges plaeriej laantesiebrie leah guejmieh prosjektesne, jïh lohkemem evtiedamme lïhke laavenjostosne dejgujmie. Journalisteööhpehtimmie hijvenlaakan NRK Saepmine jïh jeatjah saemien medijigujmie dåårrehtimmien bïjre rååresjamme.
– Bïevnesh saerniemedijinie buektedh lea joekoen vihkele dovne jealajehtemen gaavhtan gïelijste, jïh saemien byögkelesvoetem reeredh. Noerhte universiteeten lea nasjonaale dïedte dotkemen jïh ööhpehtimmien åvteste julevsaemien jïh åarjelsaemien gïelen jïh kultuvren sisnjeli. Dan åvteste iemie jïh vihkeles laavenjasse mijjese, daam faalenassem vedtedh. Jïh mijjieh joekoen geerjene laavenjostoen åvteste NRK Saepmine guktie libie daam buektiehtamme, Mathisen jeahta.
Maadthlohkeme lea uvtemes hammoedamme almetjidie gïeh barkosne, jïh vaasa 1,5 jaepieh, aktine våhkoegaavnedimmine fïerhten boelhken. Dïhte haarjanimmiem vadta vihkeles journalistihkeles maehtelesvoeti bïjre goh gaaltijelaejhteme, research jïh gihtjehtimmie, daajroereebleme jïh byögkelesvoete, jïh teeksth, tjoejem jïh guvvieh hammoedidh. Lohkeme lea seamma jïjnje goh bielie jaepie bachelor-ööhpehtimmesne.
Ohtsememierie gålkoen/rahkan 15.b.
