Meiner norske daglegvarebutikkar har for store varelager

Samuel Yeboah disputerer for sin doktorgrad ved Handelshøgskolen Nord 11. februar 2025 (sjå faktaboks).

Han har forska på arbeidskapital og likviditetsstyring, og meiner han har funne nokre nøklar til å forbetre bedriftene si yting.

Skandinavia og USA

Så kvar har han henta denne kunnskapen?

Ved å sjå på tall frå daglegvarehandelen i Noreg, Sverige, Danmark og USA har Samuel sett på korleis butikkar forvaltar sin arbeidskapital, det betyr i hovudsak kontantar, lagerbehaldning, kundefordringar og leverandørgjeld.

Ved å forvalte desse variablane på ein meir lønsam og berekraftig måte, ser han mange fordelar.

Bør utnytte tracking

– Teknologien har utvikla seg. I dag er det ingen unnskyldning at det er langt å frakte varene til butikken. Vi kan følgje med, og veit heile tida kvar varene er, seier han.

Han meiner det er alt å tene på å ha mindre varelager. Det handlar om lagerplass, oppvarming, nedkjøling, arbeidskraft, for å nemne store utgiftspostar og energisluk.

I dag er mykje kapital bunden i unødvendige varelager, og karbonavtrykket kan minkast ved å redusere lagringsfasilitetar, og dermed energiforbruk.

– Utfordrande, men slett ikkje umogleg, seier Samuel, som gjerne skulle prøvd sine forskingsfunn ut i praksis. Som butikksjef, kanskje, eller rådgjevar.

Energisparande

Samuel har vurdert alle sine funn opp mot fleire kriterium: Kostnadseffektivitet, altså minimering av kostnader utan at det går ut over kvalitet, miljømessig gevinst og lønsemd.

Her handlar det om å redusere kostnader, samtidig som du fokuserer på å auke inntekter.

Han trur daglegvarebransjen kan ha mykje å hente ved å sjå til sine kollegaer i andre bransjar. Riktig nok er det ikkje livstrugande å måtte vente på ein ny tv eller sofa i to-tre veker. Brød, derimot, må vi ha på timen. Men på norske butikklager ligg varer som fint kunne venta ein annan stad, det er den nybakte doktoren overtydd om.

− Slik kan ein auke lønsemda, redusere kostnader, forbetre miljøansvaret og minske avhengigheita av ekstern finansiering, avsluttar Samuel Yeboah.