Natta ga historikarane ny aktualitet

Presidentdebatten i USA la fredag eit relevant bakteppe for Norske historiedagar 2024. Dette er den største møteplassen for historikarar i Noreg, og årets konferanse er lagt til Nord universitet i Bodø i anledning Bodø2024.

30 år etter avstemminga om norsk tilknyting til EU er tema for historiedagane «dikotomisering». Det vil seie beskrivinga av motsetnadar.

I ei tid med fake news og konspirasjonsteoriar, blir det framleis viktig å ha folk som veit å skilje fiksjon og fakta.

Det er eit bakteppe dekan Elisabeth Ljunggren ved Fakultet for samfunnsvitenskap (FSV) ikkje lét gå uanfekta forbi.

– Desse dagane kjem svært betimeleg idet etterdønningane kom etter nattas presidentdebatt i USA, sa Ljunggren under opninga.

– Den vitskapsbaserte kunnskapen er viktig. Difor er det både synd og farleg å kutte i fagleg sektor, sjølv om eg ikkje reknar med å få noko, sa ho, og retta seg til kunnskapsminister Oddmund Løkensgard Hoel, som sjølv er historikar.

Rekordstor søking til historie

Faktum er at mange må kunne lese og forstå alt som blir sagt og skrive i det offentlege ordskiftet. I dette ligg også viktigheita av å sette hendingar i kontekst til historia.

Noko også ungdommen no ser ut til å forstå.

– Vi har rekordstor søking til årets opptak historie, fortalde Ljunggren.

Ei ibuande kraft

Det gleder ministeren.

– Vi treng folk som kan forstå kva som blir sagt og skrive, og som kan skrive godt og balansert. Eg trur aldri historiefaget går av moten. Årsaka er ønsket om å forstå fortida. Den er ibuande hos oss menneske. Slik at det kan aldri bli for mange historikarar, sa Hoel.

Norske historiedagar blir arrangert av Den norske historiske foreining, lokallaget i Bodø (Hifo Bodø), i samarbeid med Nord universitet.