Nytenkande prosjekt skal styrke framtidas forskarar i heile Europa

Gjennom samarbeid, internasjonale nettverk og innovativ læring skal prosjektet gje doktorgradskandidatar verktøya dei treng for å lukkast.

Samarbeid for framtida

METEOR (Methodologies for Teamworking in Eco-Outwards Research) samlar 13 internasjonale partnarar frå 12 land, inkludert leiande universitet og forskingsinstitutt.

Målet er å styrkje doktorgradsutdanninga og gjere forskarar betre rusta til å møte samfunnsutfordringar.

– Dette er eit fantastisk spennande prosjekt! Vi skal kartleggje doktorgradsutdanningane i 12 land for å finne dei beste løysingane, seier professor Anne Marit Valle, prosjektleiar ved Nord universitet.

Gjennom digitale ressursar, læringsfellesskap og sommarskular får deltakarane utvikla tverrfaglege ferdigheiter som teamarbeid, kommunikasjon, interkulturell kompetanse og entreprenørskap. Desse er viktige både i akademia og i arbeidslivet.

Frå forsking til røyndom

Prosjektet vil gje fordelar på fleire nivå. Doktorgradskandidatar får betre jobbutsikter, institusjonar kan tiltrekkje seg fleire talent, og arbeidsmarknaden får tilsette med avanserte ferdigheiter.

At Nord universitet er med, viser at fagmiljøet vårt har internasjonal anerkjenning.

Anne Marit Valle

– Alle er svært engasjerte i samarbeid og utvikling. At Nord universitet er med, viser at fagmiljøet vårt har internasjonal anerkjenning, seier Valle.

EU har løyvt 30 millionar kroner til prosjektet, der over tre millionar går til Nord universitet. METEOR har òg som mål å påverke utdanningspolitikken og forskingsstrategiar på europeisk nivå, samt fremje mental helse blant forskarar.

• Les også: Over 90 millioner i EU-tilslag på 12 måneder

Ei unik moglegheit for unge forskarar

METEOR handlar ikkje berre om forsking – det handlar om menneske. Ved å knyte saman ulike fagfelt og kulturar vert nye idear og løysingar skapte.

– Dette er ei unik moglegheit til å knyte nettverk og samarbeide på tvers av landegrenser, seier Valle.

– Med METEOR får morgondagens forskarar eit solid fundament for ein spennande karriere – anten i akademia, næringslivet eller offentleg sektor. Prosjektet viser at samarbeid er nøkkelen til innovasjon og utvikling, seier ho.

• Les også: Milliondryss i forskingsmidlar frå EU