Sykepleie til personer med diabetes
For personar med diabetes er god behandling og oppfølging avgjerande for å kunne leve godt med diabetes.
Emnet «Sjukepleie til personar med diabetes» har som mål å vidareutvikle studenten sin handlingskompetanse innan diabetes. Det totale læringsutbyttet er knytt til kunnskapar, ferdigheiter og generell kompetanse.
Studenten skal kunne kombinere klinisk erfaring og ekspertise med beste tilgjengelege kunnskap for å yte oppfølging og behandling av høg fagleg kvalitet. Førebygging, oppfølging og behandling ved type 1 og type 2 diabetes hos barn, unge, vaksne, gravide og eldre. Til dømes på sjukehus, sjukeheim, ulike institusjonar eller i eigen heim.
Kunnskap:
- Har avansert kunnskap om diabetes og diabetesrelaterte komplikasjonar, praktisk medikamenthandtering og oppfølging, samt kosthald, fysisk aktivitet og livsstil som blodsukkerregulerande tiltak
- Har spesialisert innsikt i førebygging, oppfølging og behandling av akutte komplikasjonar og seinkomplikasjonar ved diabetes
- Har inngåande kunnskap om brukarperspektivet og forhold som fremmar og hemmar helse og deltaking for dei som lever med diabetes
- Kan anvende kunnskapane sine på heilskaplege og innovative måtar, for å utreie livssituasjonen for personar med diabetes
Ferdigheiter:
- Kan analysere diabetesfaglege problemstillingar, og sjå det frå eit brukar- og samfunnsperspektiv, inkludert sosioøkonomiske utfordringar
- Kan analysere og forhalde seg kritisk til ulike informasjonskjelder og anvende desse til å løyse kliniske problemstillingar, formulere faglege resonnement og/eller vidareutvikle eigen handlingskompetanse og praksis
- Kan analysere eksisterande teoriar, gjeldande praksis, eiga praksisutøving og tverrfagleg samarbeid innan fagområdet diabetes
- Kan arbeide kunnskapsbasert, gjere sjølvstendige kliniske undersøkingar og vurderingar av personar med diabetes og iverksette helsefremmande, førebyggjande og behandlande tiltak, samt dokumentere desse
- Kan bruke relevante metodar, utstyr og ferdigheiter for blodsukkermåling og insulinbehandling
- Kan undervise, rettleie og samhandle med personar med diabetes, og dei pårørande, om helsefremmande, førebyggjande og behandlande tiltak
Generell kompetanse:
- Kan analysere og reflektere over etiske og faglege problemstillingar innan fagområdet diabetes
- Kan arbeide kunnskapsbasert i møte med personar med diabetes, som vil seie å planleggje og utøve sjukepleie basert på kritisk vurdering av forsking, erfaringskunnskap og pasientar sine preferansar og behov
- Kan anvende kunnskapane og ferdigheitene sine for å kvalitetssikre tenestetilbodet, forbetre prosedyrar og kritisk vurdere om helsetenestene blir tilbydde i tråd med gjeldande retningslinjer
- Beherskar fagområdet sine uttrykksformer, og kan formidle og grunngje eigne faglege synspunkt i helsetenesta og samfunnet
- Kan kommunisere og samhandle tverrfagleg med relevante yrkesgrupper og etatar, for å sikre samanheng og kvalitet på tvers av tenestestader og -nivå
- Kan bidra til nytenking innan fagområdet diabetes, og til å utvikle kunnskapsbasert praksis
Samlingsbasert der ein kombinerer nettbasert og fysisk undervisning, totalt 9 dagar. Første og andre samling blir gjennomført digitalt, medan tredje samling blir gjennomført fysisk. Samlingar på 3 dagar med førelesningar, casar, gruppearbeid og refleksjonssirklar.
Undervisninga består av veksling mellom førelesningar, studentaktivitetar og seminar. Utvalde delar av pensum blir behandla i førelesningar, men studenten har sjølv ansvar for å gjennomgå alt pensum. Det er forventa at studentane påverkar innhaldet i diskusjonar og seminar ved å bidra med eigne innspel og kommentarar.
Samansett vurdering (SV), karakterregel A-F:
- Arbeidskrav (AK), gruppe, tel 0/100 av karakteren, karakterregel Godkjent / Ikkje godkjent, må vere godkjent for å framstille seg til eksamen.
- Heimeeksamen (HJ), tel 100/100 av karakteren, karakterregel A-F.
Eksamenssvara skal alltid utarbeidast av kandidaten sjølv. Å generere oppgåvesvar ved hjelp av ChatGPT eller liknande kunstig intelligens og levere dei heilt eller delvis som eigne svar, er å rekne som fusk.
For meir informasjon om ChatGPT eller liknande kunstig intelligens, samt kjeldevising, ureglementert samarbeid og plagiering: Sjå Retningslinjer for eksamenskandidatar ved Nord universitet - rektorvedtak 16.05.23 www.nord.no/student/eksamen
