Leiv Heming Sem
Eg har vori tilsett på lærarutdanninga på Røstad sidan 2012.
Før dette var eg tilsett og knytta til Minnestaden og menneskerettssenteret Falstad 2002-2012. Fyrst som museumsleiar og forskar, i perioden 2006-09 som PhD-stipendiat ved UiO, og deretter som post doc-stipendiat ved NTNU Vitenskapsmuseet.
Eg tok PhD i kulturhistorie frå UiO (2010) med ei avhandling om norsk krigsminnekultur. Før det tok eg hovudfag i folkloristikk ved UiO (2000). Hovudoppgåva var om Moltke Moes innsamling, restituering og publisering av folkedikting.
Eg har seinare tatt kurs i UH-ped ved HiNT/DMMH (2015).
Eg underviser i norsk på både bachelor- og masternivå, mest om litterære emne, men eg har også undervist i somme språklege emne, og da mest språkhistoriske og språkpolitiske.
Sidan den faglege bakgrunnen min er folkloristikk, har eg undervist på universitetsnivå også i somme samfunnsvitskaplege fag som masteremnet Identitet og politikk ved NTNU, og eg har vori sensor på masternivå i kulturhistorie ved UiO og kulturminneforvalting ved NTNU, i tillegg til å vere sensor i norsk.
For tida er eg rettleiar for to PhD-studentar.
Forskingsinteressene mine krinsar om tre hovudemne: Eitt er litteraturhistorie, særleg munnleg folkedikting og folkloristisk faghistorie.
Eit anna hovudemne er minnekultur, særleg knytt til traumatiske hendingar. Her har særleg den norske minnekulturen etter andre verdskrigen vori sentral for meg.
Dei seinare åra har eg jobba med sørsamisk historie og identitetsbygging.
Eg leiar ei forskingsgruppe ved fakultetet der kulturell og didaktisk handsaming av traumatisk historie er kjernen.