Sáme ja álggoálmmugij dutkama guovdásj
Guovdásj galggá Nuortta universitiehta ja Nordlandsforskninga sámij ja álggoálmmugij dutkamav ja åhpadusáv koordinierit, vuojnnusij buktet ja nannit.
Nuortta universitiehtta geografijjalattjat gåbttjå dålusj julev-, bihtám-, ubbmem- ja oarjjelsáme guovlojt Sámeednamin. Nuortta universitiehtan la nasjåvnålasj åvdåsvásstádus julev- ja oarjjelsáme giela ja kultuvra dutkama ja oahpoj åvdås.
Mijá sáme guovdásj galggá aj bihtám- ja ubbmemsáme gielaj ja kultuvraj bargov sebrudahttet.
Guovdátja ásadibme álgij jagen 2022 ja dát galggá jagen 2023 joarkeduvvat váj struktuvrra ja organisasjåvnnåhábme l gárves jage 2024 rájes. Guovdásj la organisieriduvvam Åhpadiddjeoahpo, dájdda- ja kultuvrrafágaj fakultiehta vuolláj.
Guovdátja jådediddje: Tove Synnøve Mentsen Ness
Guovdátja oajvveulmme l Nuortta universitiehta ja Nordlandsforskninga sámij ja álggoálmmugij dutkamav ja åhpadusáv aktidit, vuojnnusij buktet ja nannit. Dasi gullu lahka aktisasjbarggo sáme sebrudagájn ja institusjåvnåj, giella- ja kultuvrraguovdátjij ja máhtudakbirrasij universitiehta ålggolin.
Duodden galggá guovdásj barggat guovlo, nasjåvnå ja rijkajgasskasasj guojmij siegen. Ájnas ulmme l tjuovvolit ja konkretisierit institusjåvnålasj aktisasjbarggosjiehtadusáv Sáme allaskåvlå ja Nuortta universitiehta gaskan mij vuollájtjáleduváj 2021 gålgådismánon.
