Saemien jïh aalkoeåålmegelohkemi jarnge
Jarnge edtja dotkemem jïh ööhpehtimmiem saemien- jïh aalkoeåålmegi bïjre Noerhte universiteetesne jïh Nordlandsforskningesne iktedidh, vååjnedehtedh jïh nænnoestidh.
Noerhte universiteete doh aerpievuekien julevsaemien, bidumsaemien, upmejesaemien jïh åarjelsaemien dajvh Saepmesne feerhmie. Noerhte universiteete nasjonaale dïedtem åtna dotkemen jïh ööhpehtimmien åvteste julev- jïh åarjelsaemien gïelen jïh kultuvren sisnjeli.
Mijjen saemien jarnge sæjhta aaj barkoem feerhmedh bidum- jïh upmejesaemien gïeline jïh kultuvrine.
Tseegkeme jarngeste eelki 2022 jïh edtja guhkiebasse evtiesovvedh 2023, guktie struktuvre jïh organisasjovnehammoe edtja vihtiestamme årrodh 2024 raejeste. Jarnge lea bïejesovveme Lohkehtæjjaööhpehtimmien jïh tjeahpoe- jïh kultuvrefaagen fakulteeten nualan.
Jarngen åvtehke: Tove Synnøve Mentsen Ness
Jarngen åejvieulmie lea ööhpehtimmiem jïh dotkemem saemien- jïh aalkoeåålmegi bïjre iktedidh, vååjnedehtedh jïh nænnoestidh Noerhte universiteetesne jïh Nordlandsforskningesne. Daate aaj lïhke laavenjostoem feerhmie saemien seabradahkine jïh dan institusjovnigujmie, gïele- jïh kultuvrejarngigujmie jïh maahtoebyjresigujmie universiteeten ålkolen.
Lissine jarnge sæjhta regijonaale, nasjonaale jïh gaskenasjonaale laavenjostoeguejmiejgujmie laavenjostedh. Vihkele ulmie lea dam institusjonelle laavenjostoelatjkoem Saemien jïlleskuvlen jïh Noerhte universiteeten gaskem dåarjoehtidh jïh tjïelkestehtedh maam vuelietjeelin golken 2021.
